A sección quinta da Audiencia Provincial de Pontevedra, con sede en Vigo, condenou a dous acusados de agredir a dous mozos de madrugada na rúa Hernán Cortés, provocando que caesen ao chan en estado de semiinconsciencia. A un deles impúxolle cinco anos e tres meses de cárcere; e, ao outro, catro anos e tres meses de prisión. O tribunal considera a ambos coautores dun delito de lesións con deformidade, concorrendo a agravante de abuso de superioridade, e dun delito leve de lesións, polo que cada un deles deberá pagar unha multa de 360 euros. Ademais, a Sala condenounos a indemnizar a unha das vítimas con 594 euros; e, á outra, con 15.938 euros, así como a abonar 3.630 euros ao Servizo Galego de Saúde.
O tribunal considera probado que os acusados, sobre as cinco da madrugada do día 30 de xaneiro de 2022, cando se atopaban na rúa Hernán Cortés de Vigo, estableceron unha discusión con dúas persoas, no transcurso da cal, “de común acordo, tanto na acción como no resultado, e con ánimo de menoscabar a integridade física dos mesmos”, propináronlles diversos golpes, que provocaron a caída de ambos ao chan en estado de semiinconsciencia. En concreto, a Sala relata que os acusados se dirixiron cara a unha das vítimas, arroiándoa, lanzándolle diversos golpes cos puños, alcanzándoa, polo menos un deles, de cheo, o que provocou que caese ao chan, quedando inconsciente.
Os maxistrados indican que, inmediatamente despois, ambos os acusados dirixíronse cara ao outro afectado, propinándolle varias puñadas e patadas, conseguindo acurralalo contra a parede, dándolle puñadas. E, unha vez que conseguiu escabullarse e escapar rúa abaixo, foi perseguido por ambos condenados, alcanzándoo un deles, quen, mediante múltiples patadas, agarróns e golpes, logrou tiralo ao chan, onde continuou golpeándoo ata que un transeúnte tratou de intervir para separalo da vítima. Finalmente, o outro acusado propinoulle á vítima dúas fortes patadas na cabeza, tras o cal ambos os acusados abandonaron xuntos o lugar, deixando a ambos os prexudicados en estado de semiinconsciencia e tirados no chan. A sentenza non é firme, pois cabe presentar recurso ante o TSXG.
