Unha veciña de Cangas foi interceptada pola Garda Civil cando circulaba a unha velocidade superior á permitida e no rexistro do vehículo incautan 20 gramos de cocaína.
A Garda Civil investiga a unha veciña de Cangas acusada dun presunto delito contra a saúde pública ao ser sorprendida con 20 gramos de cocaína no seu vehículo.
Os feitos sucederon na tarde de onte luns, na estrada PO-551, á altura de Cangas no transcurso dun punto de verificación de vehículos establecido por efectivos da patrulla da Garda Civil da Compañía de Pontevedra.
A velocidade inadecuada do turismo fixo que fose interceptado e ao solicitarlle a documentación os axentes observan na condutora un evidente estado de nerviosismo, polo que, co apoio dunha patrulla do Subsector de Tráfico da Garda Civil de Pontevedra, realízaselle a proba de drogas, dando resultado positivo indiciario en cocaína, pendente de confirmar polo laboratorio.
No rexistro do vehículo atópanse con envoltorios de plástico que conteñen unha sustancia, supostamente cocaína, cun peso de 20 gramos, superando notablemente a cantidade para autoconsumo, e unha carteira con útiles para consumir.
No asento de atrás viaxaba o seu bebé, que foi entregado por ela ao seu pai para que se fixese cargo do mesmo.
