Debate sobre o estado da autonomía de Galicia, o primeiro de Alfonso Rueda como presidente da Xunta. Na tribuna Rueda anunciou que todas as persoas dependentes que estean atendidas no seu domicilio —por un familiar, un veciño ou un profesional— terán dereito a un bono de 5.000 euros ao ano.
Como hai determinadas situacións nas que non é viable recibir atención a domicilio, todas as persoas dependentes que dispoñan dun bono para desprazarse á residencia da súa elección recibirán un complemento de 1.200 euros ao ano. Este plus, independentemente da capacidade económica e o grao de dependencia, sumarase ás cantidades xa percibidas e supoñerá un incremento medio do 30%. «É unha medida sen precedentes nin equivalentes en España», salientou.
