Paul Krugman era o gran atractivo da xornada inaugural do Viglobal Summit 2023, organizado pola Zona Franca de Vigo, e a súa presenza no Congreso constatou de maneira
absoluta esa expectación creada. O prestixioso economista estadounidense, Premio Nobel de Economía en 2018, foi a gran estrela dun encontro que está a servir para poñer a Galicia, en xeral, e a Vigo, en particular, no primeiro plano da economía
mundial.
O economista estadounidense mostrouse “bastante optimista” con respecto “ás posibilidades de que controlemos a inflación”, cuxo aumento foi xeral na maior parte dos países do mundo nos últimos tempos. Krugman recoñeceu que “cando botemos a
vista atrás, darémonos conta de que a inflación non supuxo un cambio importante á hora de tomar decisións políticas” e asegurou que “o que están a facer os gobernos de todo o
mundo, que é tentando arrefriar a economía, non é algo erróneo”.
O que fose Premio Nobel de Economía en 2018 tamén analizou o notable aumento da débeda pública, no mesmo grao tanto en España como en Estados Unidos, pero non
mostrou gran preocupación por iso: “Mellor sería se non tivésemos esa débeda pública, claro, pero non está entre as miñas 10 máximas preocupacións”. Neste ámbito negativo, Krugman deixouno meridianamente claro: “As cuestións que máis me preocupan son
o cambio climático, ese desastre que se aveciña, e o influxo das ideas populistas en todo o mundo”.
Viglobal Summit 2023 concluirá mañá mércores coa celebración de dúas mesas redondas, a primeira sobre o futuro da banca e a segunda, centrada nas cidades como motor da economía, e pecharase cun broche final á altura da intervención de Paul Krugman. O economista indio-estadounidense Abhijit Banerjee, Premio Nobel de Economía en 2019,
pronunciará a conferencia final dun evento que volveu a situar a Galicia no mapa da economía mundial.
