A sección segunda da Audiencia Provincial da Coruña condenou a 13 meses de cárcere a un axente da Policía Nacional por furtar un teléfono móbil. Ademais, inhabilitouno para o exercicio da súa profesión de funcionario do Corpo Nacional de Policía durante o tempo da condena e impúxolle o pagamento dunha indemnización ao establecemento afectado de 722 euros.
No fallo, os xuíces explican que o policía nacional acudiu, xunto con outros compañeiros, o 16 de xullo de 2017 a unha tenda de telefonía móbil á que entraran a roubar a través dun buraco realizado no falso teito do almacén do local. “Aproveitando a desorde xerada no establecemento e que a encargada, pola súa condición de funcionario do Corpo Nacional de Policía, non ía sospeitar do seu comportamento nin a prestarlle unha especial atención, o acusado fíxose dun modo subrepticio cun dos terminais móbiles que se atopaban no establecemento, en concreto un teléfono da marca Samsung Galaxy S8 Plus Blue, cuxo prezo de venda ao público era de 722 euros”, relata o tribunal na sentenza, na que indica que, tras ocultalo, “o sacou do local e o quedou para si, na crenza de que, dada a cantidade de aparellos subtraídos, a responsable do comercio pensaría que formaba parte dos que inicialmente levaron o autor ou autores do roubo”. A sentenza non é firme, pois contra ela cabe presentar recurso.
