Unha operación da Brigada de Estupefacientes (UDYCO) da Policía Nacional de Pontevedra deixa dous detidos en Nigrán e a incautación de 24,5 quilos de heroína.
O inspector da UDYCO, José Abreu, que dirixiu a investigación, a droga comisada é de grande pureza e «é preciso cortala, senón sería auténtico veleno para os consumidores».
A policía calcula que ese primeiro corte antes de poñelo no mercado para a venda ao por maior daría un total de 65 quilos de droga que alcanzarían un valor superior ao millón e medio de euros.
O inspector Abreu explicou que os investigadores tiñan coñecemento de que grupo organizado estaba introducindo grandes cantidades de heroína que facían chegar dende o norte de Europa. O seu destino era a distribución por Portugal e España, «pero evidentemente por onde pasa, algo queda», di o inspector.
Este domingo pasado o seguimento deu na detención de dúas persoas nun coche que interceptaron en Nigrán. No vehículo había 20 quilos de heroína. Catro quilos e medio máis foron atopados noutro coche nun garaxe desta vila pontevedresa.
Os dous detidos son un home e unha muller, de nacionalidade española, e residentes en Galicia. Contan con antecentes.
O inspector Abreu explicou na súa comparecencia que a heroína «é raro que chegue por mar». «Case todas as operacións son con ocultación en coches ou camións con dobres fondos», dixo.
Nos últimos dez anos desde a comisaría da Policía Nacional en Pontevedra incautáronse de máis de 200 quilos de heroína. «É unha auténtica barbaridade», di o inspector que di que explica que esas grandes cantidades teñen unha explicación: ás organizacións internacionais gústalles tratar cos narcos galegos porque «son serios traballando».
A operación foi saúdada polo comisario xefe de Pontevedra, Juan José Díaz Jiménez, e pola subdelegada do Goberno, Maica Larriba, que felicitaron aos axentes que a levaron a cabo.
Larriba dixo que a retirada do mercado desta droga «é saúde».
