O socialista José Ramón Gómez Besteiro tomou posesión na Coruña como delegado do Goberno en Galicia.
O acto celebrouse en Palexco, baixo a presidencia do presidente da Xunta de Galicia, Alfonso Rueda, en presenza do ministro do Goberno de España José Miñones, antecesor de Besteiro na Delegación do Goberno. Besteiro puxo a «xustiza» no centro da súa restitución como cargo público.
O xa novo delegado do Goberno dixo que traballará seguindo as liñas marcadas polo Executivo de Pedro Sánchez: os da xustiza social, económica e ecolóxica, e destacou a palabra xustiza, «cun importante significado para o meu». O seu nomeamento supón, de feito, a súa rehabilitación política tras verse obrigado a dimitir como secretario xeral do PSdeG – PSOE tras ser imputado en dez ocasiones, aínda que todas as causas foron arquivadas posteriormente.
É o terceiro socialista no cargo desde a moción de censura de 2018, tras Javier Losada e José Miñones. Antes que eles estiveron á fronte da Delegación do Goberno Domingo García-Sabell, Juan Miguel Diz Guedes, Arsenio Fernández de Mesa, Manuel Ameijeiras, Antón Louro, Miguel Ángel Cortizo, Xosé Manuel Pouse, Samuel Juárez e Santiago Villanueva.
José Ramón Gómez Besteiro (Lugo, 1967) é licenciado en Dereito pola Universidade de Santiago de Compostela e avogado, profesión que exerceu antes da súa entrada na actividade política.
