As obras de restauración integral desta peza arquitectónica supoñen un investimento de 250.000 euros, aos que hai que sumar os 498.213 euros para a humanización do Campo da Feira onde se localiza
Un dos emblemas patrimoniais do Porriño, o icónico Templete de San Luis, será obxecto dunha restauración integral. A posta en valor desta peza de Antonio Palacios, situada no parque do antigo Campo da Feira, requirirá unha inversión de 250.000 euros que financiará a Xunta de Galicia. Así o avanzaron o conselleiro de Cultura, Educación, FP e Universidades, Román Rodríguez, e o alcalde do Porriño, Alejandro Lorenzo, que visitaron esta peza arquitectónica para comprobar o seu estado actual.
O titular de Cultura salientou o carácter “emblemático” do templete, autoría “dun galego convertido nunha figura imprescindible da arquitectura en un urbanista de referencia”. Neste sentido, referiuse ao compromiso da Xunta por “poñer en valor e divulgar o legado que Palacios ten en Galicia, no que este templete ocupa un lugar destacado que merece ser valorado”.
No mesmo sentido se manifestou o alcalde, Alejandro Lorenzo, que agradeceu “á Xunta de Galicia o apoio a este proxecto que sen dúbida pon en valor non só esta peza, senón o legado que un porriñés referente deixou no seu pobo”. Engadiu o rexedor que “dende o Concello queremos reivindicar a figura de Antonio Palacios” e adiantou que a tal fin “proxectamos un espazo que albergará obra importante do arquitecto, pezas de gran valor que estarán ao dispor de toda a cidadanía”.
No caso do Templete a estrutura está visiblemente deteriorada pola entrada de auga nas xuntas e a presenza de ferro oxidado debido, sobre todo, á ausencia dun elemento de cubrición. Tamén se aprecian manchas de oxidación, presenza de plantas superiores e pátina biolóxica de liques. Por iso as actuacións previstas consistirán na reparación dos danos nos elementos construtivos de parámetros, fachadas, cuberta e acabados, así como a renovación do pavimento e o ámbito urbano inmediato á peza arquitectónica de Palacios.
O templete foi construído en 1919 por Antonio Palacios para acceder á estación de metro na Gran Vía en Madrid. Está incluído no proxecto que lle encargou en 1917 a Compañía Metropolitana e que comprendía o deseño e a decoración de todos os espazos interiores e exteriores da liña Sol-Vendas. A construción orixinal contaba cun ascensor no seu interior que quedou en desuso despois de colocarse as escaleiras mecánicas. Isto acelerou a súa desmontaxe en 1970. Foi posteriormente enviado ao Porriño ser a cidade natal do arquitecto, despois de varias alternativas para a súa localización en Madrid.
