Desarticulada unha organización criminal internacional dedicada ao tráfico de angulas do Miño entre Galicia e Portugal.
Os principais integrantes da rede estaban no país luso. Interviñéronselles máis de 400 quilos de angulas pescadas de forma ilegal no río Miño, sen as preceptivas licenzas nin permisos.
As autoridades detiveron dúas persoas en Pontevedra, onde se realizaron dous rexistros, en colaboración con veterinarios do servizo de Gardacostas da Xunta de Galicia. Neles requisaron preto de 77.000 euros.
En Portugal, mentres, realizáronse nove rexistros. Investíganse once persoas como presuntos membros desta organización criminal, ás que se lles interviñeron seis vehículos.
A todos os arrestados impútanselles os delitos de tráfico de especies protexidas, falsidade documental, fraude de IVE e posibles infraccións de contrabando.
Segundo os investigadores, esta organización, que estendía a súa actividade entre España e Portugal, dedicábase á adquisición, almacenaxe, distribución e exportación de angulas pescadas de forma ilegal no río Miño, sen permisos nin licenzas correspondentes.
A operación foi desenvolta conxuntamente entre a Policía Nacional, o Servizo de Vixilancia Aduaneira, a Policía Autonómica galega e a Policía Marítima de Portugal.
O diñeiro e as angulas intervidas quedaron á disposición do xulgado.
