Un veciño de Tomiño, de 45 anos, foi localizado agochado nunha arqueta de augas pluviais tras sufrir un sinistro ao volante na A-55 ao seu paso por Tui.
Triplicou a taxa máxima permitida ao volante en alcol e tamén deu positivo en varias drogas.
A Garda Civil de Pontevedra recibiu unha chamada informando dun sinistro no quilómetro 27 da autovía A-55, ao seu paso por Tui, o pasado día 3 de febreiro.
Desprazáronse dúas patrullas, que comprobaron a presenza na vía dun vehículo que presentaba danos considerables e ocupaba o carril dereito sentido Vigo. O coche accidentado, sen sinalizar, sufrira unha saída de vía pola marxe dereita e un choque contra a barreira de seguridade lateral.
Con todo, non localizaron ningunha persoa nin no seu interior nin nos arredores, polo que iniciaron unha busca ante o risco de que o condutor estivese ferido ou desorientado.
Outro condutor informounos de que o responsable do sinistro abandonara o lugar dos feitos, presumiblemente baixo os efectos do alcol.
A uns 50 metros do lugar do accidente, os axentes localizaron o home oculto nunha arqueta de canalización de augas pluviais.
O condutor, un veciño de Tomiño de 45 anos, deu positivo na proba de alcoholemia, triplicando o tope máximo permitido, e deu positivo en cocaína, anfetaminas, opiáceos e THC.
