Serán recibidos por arredor de 1.100 nenas e nenos os días 19, 20 e 21 de decembro
O alumnado que cursa ensinanzas de Educación Infantil e Primaria do Porriño recibirán a visita de Papá Noel e do seu reno Rudolf os días 19, 20 e 21 de decembro, grazas á iniciativa da Concellería de Educación e da OMIX do Porriño.
Papá Noel comezará a súa andaina o luns día 19 nos centros CEIP da Cruz-Budiño, CEIP da Ribeira e CEIP Fernández López. O martes 20 retomará a súa actividade nos colexios CEIP de Atios, EI de Mosende e Aceesca e mércores 21 concluirá as súas visitas nos centros CEIP Antonio Palacios, CPR Santo Tomás e CPR Hermanos Quiroga.
Visitarán cada un dos colexios para saudar a todas as clases e interactuar co arredor de 1.100 estudantes, ademais de recibir todos os seus desexos e ilusións para estas datas sinaladas tan especiais.
A concelleira de Educación, Carolina González, indicou que “se hai datas que se celebran con especial coidado nos nosos colexios é, sen dúbida, as do Nadal. É unha das datas especiais do ano que conmemoramos nas aulas. As escolas disfrázanse, énchense de actividades relacionadas coas vacacións de Nadal e sempre hai algún evento especial para celebrar. Dende o Concello queremos seguir fomentando o espírito do Nadal e a ilusión destas datas entre as/os máis pequenas/os da casa, á vez que seguimos traballando para conseguir integralas/os na sociedade na que vivimos en todos os sentidos, así como en todo o relacionado coa nosa cultura”
