O BOP recolle hoxe as bases que rexerán o proceso selectivo de sete prazas de bombeiro condutor para o parque de bombeiros de Ferrol. O Concello de Ferrol convoca estas probas mediante o sistema de oposición para a selección de sete prazas de bombeiro condutor da Escala de Administración Especial, Subescala de servizos especiais, clase extinción de incendios, Grupo C, Subgrupo C2, persoal funcionario de carreira.
Entre as funcións a realizar por estes profesionais son a extinción de incendios forestais, urbanos, rurais e industriais, excarceración en accidentes de tráfico, ferroviarios e aéreos, rescates verticais e evacuacións, urxencias con mercadorías perigosas, retirada de elementos perigosos e procura de vítimas de catástrofes, entre outras.
O Concello explica que «o persoal funcionario estará obrigado a manter en forma continua as súas condicións de aptitude física e profesional mediante a asistencia a cursos de formación física, teórica e práctica, así como asistir aos cursos de perfeccionamento profesional considerados necesarios pola xefatura do servizo».
As características do posto son Grupo C, subgrupo C2, Complemento Destino Nivel 16, Complemento específico 2025:11.617,90 €/ano (829,85 €/mes).
As persoas interesadas en participar nesta selección terán de prazo para a presentación de solicitudes 20 días hábiles contados a partir do seguinte ao da publicación do anuncio no BOP.
