A Zona Franca de Vigo contará coa colaboración do Concello de Salvaterra para impulsar o novo espazo que o Consorcio dispoñerá na PLISAN (Plataforma Loxística Industrial de Salvaterra – As Neves), onde o CZFV construirá naves modulares en réxime de alugueiro para o tecido empresarial.
No encontro celebrado esta mañá na sede de Arenal, o delegado Especial do Estado na Zona Franca de Vigo, David Regades, e a alcaldesa de Salvaterra, Marta Valcárcel, coincidieron na vantaxe de potenciar a colaboración institucional entre ambos organismos e establecer unha dinámica de traballo para impulsar toda a tramitación necesaria, co fin de que o proxecto da Zona Franca sexa unha realidade o antes posible.
«Persoal técnico do Consorcio e do Concello estarán así en contacto permanente para axilizar toda a parte administrativa do proxecto», segundo indican desde o Consorcio. Neste contexto, o delegado David Regades, que agradeceu a Valcárcel a súa disposición, detallou á alcaldesa os pasos do proceso. “Xa temos en licitación a redacción do anteproxecto, proxecto básico, de execución e dirección de obra para a construción das naves. Estará finalizado no segundo semestre do ano polo que poderemos licitar e estaremos iniciando as obras en 2026”.
O delegado informou tamén que na primeira semana de abril o Consorcio asinará coa Xunta e a Autoridade Portuaria a compra das dúas illas onde se van edificar as naves. “Son 42.000 metros cadrados máis de terreo para desenvolver solo industrial desde o Consorcio e construír as naves que serán modulares, diáfanas e cunha superficie aproximada de 1.000 m2. Xa estamos traballando no seu deseño”. Regades tamén avanzou que neste novo espazo “se reservará unha zona para poder realizar naves a medida para proxectos singulares”.
Tanto o delegado de Zona Franca como a alcaldesa puxeron en valor que o proxecto do CZFV, ademais de «contribuír a xerar riqueza e emprego, tamén suporá un novo impulso á consolidación do propio polígono da PLISAN, xa que as empresas cando consolidan a súa actividade na nave arrendada buscan crecer e comprar unha parcela ou construír a instalación á súa medida mentres xa están desenvolvendo a súa actividade».
