O subdelegado do Goberno en Pontevedra, Abel Losada, presidiu a Xunta Local de Seguridade no Concello de Baiona, na que se asinaron o convenio de adhesión ao sistema integral de protección das mulleres vítimas de violencia de xénero e o protocolo de colaboración da Policía Local coa Garda Civil.
“Hoxe é un día para celebrar, porque Baiona pasa a formar parte do grupo de municipios desta provincia que están directamente implicados na protección das mulleres”, afirmou Losada, quen agradeceu a unanimidade de toda a Corporación municipal, con tódolos grupos políticos a favor. Un recoñecemento que personificou no alcalde, Jesús Almuíña, “quen, dende o primeiro momento, amosou o máximo interese”.
Abel Losada destacou que lle produce especial satisfacción a entrada de Baiona no sistema integral VioGén, “porque este municipio leva gravada a dor polos asasinatos de Beatriz Lijó en 2023 e de Estela Blach en 2024, dous feminicidios que nos conmocionaron a todos e todas; así que, en certo sentido, queremos que isto sexa tamén unha homenaxe”. O subdelegado subliñou que o risco cero nunca existe: “vivimos nunha sociedade da que a violencia forma parte, pero está moi claro que se a Policía Local colabora coa Garda Civil podemos dicirlle ás mulleres de Baiona que están máis acompañadas e que hai máis recursos ao seu dispor”.
En Baiona hai 12 casos dados de alta en VioGén, dos que dous están en risco medio, catro en baixo e 8 en non apreciado. No que vai do ano 2025 incorporáronse tres mulleres ao sistema. Do total de 12 casos, 7 mulleres teñen orde xudicial de protección. Ademais, unha muller dispón de teléfono do programa Atempro para dar conta de posibles incidencias.
Baiona ten recibido un total de 42.599 euros do Pacto de Estado de Violencia de Xénero dende o ano 2018. Na última anualidade percibiu 5.730,44 euros. Coa súa incorporación a VioGén estes fondos vanse ver incrementados.
Coa sinatura do convenio de Baiona son xa 19 os municipios da provincia adheridos ao sistema: Bueu, Caldas de Reis, O Grove, Lalín, Marín, Ponteareas, Pontevedra, O Porriño, Redondela, Salceda de Caselas, Sanxenxo, Tui, Vigo, Vilagarcía de Arousa, A Guarda, Moaña, Mos e Baiona. O criterio da Subdelegación do Goberno en Pontevedra é incentivar a incorporación de tódolos concellos que conten cunha Policía Local con catro ou máis axentes.
Datos de criminalidade
A Xunta de Seguridade repasou tamén os datos de criminalidade do ano 2024 certificando que foi un ano extremadamente seguro, dado que as estatísticas amosan un descenso total do 10,1%, que se reparte entre un descenso de case o 3% nos delitos graves e menos graves, dun 18,2% nos leves e, finalmente, dun 12,8% nas infraccións administrativas.
