Salceda de Caselas estrea sinaléctica instalada nos puntos de interese turístico do municipio no marco dunha subvención que Turismo de Galicia destina a concellos de menos de 10.000 habitantes co fin de que melloren as súas infraestruturas turísticas.
Así o destacou a delegada territorial da Xunta de Galicia en Vigo, Ana Ortiz, xunto á alcaldesa do municipio, Loli Castiñeira, na visita realizada a estas novas sinais. A representante autonómica explicou que o Concello de Salceda destinou os 28.474 euros que lle foron concedidos á sinalización da rede municipal de micropaisaxes.
«O obxectivo fundamental desta axuda é fomentar a recuperación, a accesibilidade e a sinalización dos recursos turísticos de cara á consolidación da oferta turística nas zonas rurais a través da posta en valor da súa riqueza histórica, cultural, patrimonial e paisaxística» sinalou Ortiz.
Esta orde de axudas, ten como fin subvencionar actuacións de embelecemento nos accesos a recursos turísticos dos Concellos, como a recuperación e tratamento paisaxístico da contorna, iluminación ornamental, recuperación e creación de miradoiros paisaxísticos, sendeiros, rutas e outros elementos de interese turísticos; adecuación de espazos destinados ao estacionamento de vehículos dos visitantes e actuacións de embelecemento dos bens declarados de interese cultural.
