Javier del Valle Crespo gañou o ouro; Xabier Pérez Sousa e Óscar Morales Rejas, a prata e Carlos Pérez Méndez e Alex Pino Fernández, bronce.
A alcaldesa de Mos, Nidia Arévalo; o concelleiro mosense de Deportes, José Areal, e o alcalde do Porriño, Alejandro Lorenzo, achegáronse ata as instalacións do Club Xadrez Mos no antigo Centro Cultural de Torroso, para visitar aos rapaces e rapazas xadrecistas do club, dos que un 20% son veciños do concello porriñés, durante os seus adestramentos e aproveitaron para felicitalos polos resultados obtidos nos Campionatos Provinciais, de onde trouxeron para Mos un total de cinco medallas.
Os Campionatos Provinciais por Idades 2022 celebráronse as fins de semana dos días 29 e 30 de xaneiro e 5 e 6 de febreiro en Vilagarcía de Arousa.
O Club Xadrez Mos enviou 49 participantes á competición e, deses 49, 23 clasificáronse entre os 10 primeiros postos, conseguindo 5 medallas:
- Javier del Valle Crespo, Ouro, en categoría Sub-14.
- Xabier Pérez Sousa, Prata en categoría Sub-16.
- Óscar Morales Rejas, Prata en categoría absoluta.
- Carlos Pérez Méndez, Bronce en categoría sub-10.
- Alex Pino Fernández, Bronce en categoría Sub-8.
Un ano máis, o Club Xadrez Mos foi un dos que enviou máis xogadores e xogadoras á competición, e dos que mellores resultados obtivo.
Liga Galega
Por outra banda, o pasado sábado 12 febreiro comezou a Liga Galega por Equipos de Club, onde están a participar 9 equipos do Club Xadrez Mos, formados por un total de 64 xogadores e xogadoras.
A competición xógase a nivel autonómico, todos os sábados, ata o vindeiro sábado 23 de abril.
