Un mariñeiro ghanés, veciño de Marín, é o terceiro tripulante supervivente identificado do naufraxio do pesqueiro Villa de Pitanxo, con base en Marín . Os tres falaron coas súas familias e recupéranse pouco a pouco dos efectos da hipotermia que sufriron.
Media ducia de barcos, un helicóptero e un buque da armada canadense participan nos labores de rescate fronte ás costas de Terranova. Fano nunhas condicións durísimas.
Hai moi mala visibilidade, ondas de entre catro e cinco metros de altura, ventos fortes e a temperatura da auga é moi baixa.
A conselleira do Mar, Rosa Quintana, explica que «a situación é moi difícil, a esperanza é poder atopar os corpos dos desaparecidos».
Galicia declarou loito oficial e celebrou un Consello da Xunta extraordinario. Nun acto de loito gardouse un minuto de silenzo, seguido dun aplauso e houbo unha lectura institucional.
Quintana confirmou que hai tres superviventes, dez falecidos e once desaparecidos.
Os superviventes son dous veciños de Cangas, un deles o patrón do barco. O terceiro é un veciño de Marín natural de Ghana.
Os buques de pesca que se atopan na zona seguen rastrexando a zona ao igual que os buques da Armada do Canadá e os helicópteros.
Os tres superviventes continúan abordo do Playa de Menduiña 2 e os cadáveres están repartidos entre ese barco, dous portugueses e un mercante.
Polo de agora, Quintana dixo que non sabía cando os tres superviventes ían volver a terra porque o Playa de Menduiña continúa cos labores de busca.
A conselleira avanzou que «as esperanzas de atopalos vivos son pequenas e temos que entender que a temperatura desas augas é moi fría».
A conselleira do Mar destacou que «os superviventes están vivindo unha situación emocional moi complicada e hai que esperar a que se tranquilicen para que poidan achegar luz de como pasou o accidente».
Sobre se falou coas familias dos tripulantes, Quintana dixo que aínda non e que só o fixo coa empresa armadora, co xerente da cooperativa de armadores de Vigo e os alcaldes da zona.
