Galicia é a comunidade autónoma que lidera o nivel de execución dos pagos da Política Agraria Común (PAC) cun 83% do total xa aboado, fronte ao 53% da media estatal. Ademais, Galicia está a 11 puntos de referencia fronte á segunda rexión máis favorecida, que executou o 72%. Neste sentido, maniféstase o compromiso da Xunta co sector primario galego, apostando sempre pola axilidade ao tempo que se garante a seguridade xurídica dos máis de 23.000 gandeiros, gandeiras, agricultores e agricultoras que se benefician cada ano destas aportacións.
A Consellería do Medio Rural xa executou, con varias semanas de antelación, os 45 millóns de euros do anticipo da PAC, adiantando os pagos ao mes de outubro, cando é habitual cobralos en novembro. Este avance é de vital importancia para o sector primario galego, xa que permite inxectar un diñeiro inicial que dá a posibilidade aos agricultores e agricultoras así como aos gandeiros e gandeiras de comezar a operar sen ter que esperar a que abra o prazo de pagamento da PAC.
Cómpre salientar que estes 45 millóns foron destinados ás liñas de vacún lácteo e cárnico, xa que son achegas non asociadas a superficies. Isto permite realizar os cálculos totalmente sen asumir riscos e salvagardar a seguridade xurídica dos beneficiarios, xa que no mes de outubro aínda non están finalizados os controis de monitorización que inflúen nestas achegas.
Seguindo esta liña, Galicia pagou as axudas da PAC por un importe que ascende a uns 117 millóns de euros; desglosados en máis de 99,3 millóns de achegas directas e outros case 17,73 millóns nas destinadas a zonas con limitacións naturais. Así, Galicia beneficiarase de máis de 160 millóns de euros, tendo en conta tamén o anticipo, antes de que remate o ano e dentro do primeiro mes a partir do que se permitan os pagamentos da campaña en curso. Esta cantidade permitirá que o sector agrario e gandeiro poida acometer a súa actividade dende os primeiros días do seu ciclo agrario, dotándoo de liquidez dende o inicio.
