O Partido Socialista e as Xuventudes Socialistas propoñen crear na cidade de Ourense un Banco Público de Aluguer, unha medida «pensada para toda a xente, pero sobre todo para os 250.000 mozos e mozas que non se poden emancipar e destinan máis do 60% dos seus ingresos ao aluguer», segundo explicaron nunha rolda de prensa.
Neste contexto, indicaron que «na cidade de Ourense hai máis de 18.000 vivendas baleiras esperando a ser catalogadas pola Xunta como desocupadas, as cales o goberno de Jácome non inspecciona porque lle preocupa máis a Gramola». Ademais, o secretario xeral de Xuventudes Socualistas, explicou que «esta medida revitalizaría o casco histórico da cidade, e facilitaría o acceso á vivenda á xente nova, e non tan nova, no centro da cidade sen ter que buscar fóra dela”.
Pola súa banda, Xurxo Doval, secretario xeral galego, remarcou que o que se persegue «é que as persoas non destinen máis do 30% do seu salario, nunha Comunidade Autónoma na que 1 de cada 3 galegos cobra o Salario Mínimo Interprofesional ou menos”.
Frear a suba de impostos
Segundo indicaron os socialistas, o Banco Público de Aluguer, ou Banco Galego de Vivenda, permitiría frear a suba de prezos que na cidade de Ourense xa se traducen nunha suba do 57% nos últimos 10 anos, segundo explicaron as e os socialistas ante os medios de comunicación. E consiste nun organismo público, da Xunta, «que exercería como intermediario entre arrendador e arrendatario».
