Máis de duascentas persoas manifestáronse hoxe en Ponteareas para reclamar «inclusión real» nos colexios da comarca do Condado e da Louriña. Precisamente, a manifestación estaba convocada por FANPO, a Federación de Anpas da comarca do Condado e da Louriña, co obxectivo de reclamar á consellería de Educación «máis profesores especialistas que atendan ao alumnado con necesidades educativas especiais e necesidades de apoio educativo».
Despregaron seis pancartas nas que se podía ler «polos dereitos dos nosos fillos» e «ANPAS galegas na defensa do ensino público» así como «iguais en dereitos nunha sociedade diversa» e «non imos calar», entre outros lemas.
Ademais das persoas que pertencen aos diferentes colexios das comarcas, tamén asistiron á concentración o edil de Educación, Ricardo González, o voceiro do BNG, Miguel Bouzó e os nacionalistas José Carlos Vázquez, Cristina Fernández e Fran Aparicio así como os edís socialistas Vanesa Fernández e Rubén Pérez e o voceiro de Ponteareas en Común, Manoel Ucha. Do mesmo xeito, o ex alcalde de Baiona e agora deputado, Carlos Gomez e o deputado socialista Gregorio Luís Agís acudiron á chamada das anpas.
