O documento está dispoñible na web municipal para a súa descarga.
O Concello de Oia facilita á veciñanza alegar en contra do parque eólico do Merendón. Así se acordou na reunión mantida o martes en Loureza e o modelo descargable está dispoñible na páxina web do Concello de Oia.
O documento está accesible desde o mércores, nos formatos Word e PDF, no apartado da web municipal dedicado ao proxecto eólico do Merendón. Así, queda a disposición de todos os veciños e as veciñas que queiran presentar as súas propias alegacións en contra deste proxecto eólico. Para facelo, a persoa interesada deberá descargar, cubrir e asinar o modelo, e presentalo no rexistro municipal (de xeito presencial ou telemático) xunto co seu DNI. O prazo remata o próximo día 14.
O antedito modelo de alegacións está dispoñible no seguinte apartado da web do Concello de Oia: https://www.concellodeoia.es/parque-eolico-do-merendon/ Nesta sección se inclúe a documentación relativa ao expediente do proxecto eólico do Merendón e máis os modelos de alegacións.
O proxecto do Merendón prevé a construción de 5 aeroxeneradores nos concellos de Oia (nas parroquias de Santa María de Oia e Loureza) e O Rosal. Esta actuación afectaría a espazos como as áreas de interese paisaxístico do Chan da Valga ou os Muíños do Folón e do Picón, ámbitos que tamén presentan importantes valores ambientais e patrimoniais.
Alegacións do Concello
O Concello está a ultimar as súas alegacións contra o proxecto eólico, nas que manifestará o seu rexeitamento atendendo aos posibles prexuízos sociais, paisaxísticos e ambientais que causaría a súa posta en marcha. Unha vez presentadas, actualizará o apartado web para incluír o documento oficial, ao igual que no seu momento fixo co parque eólico Albariño I.
Amáis, a adminsitración local asegura que irá informando sobre outros proxectos eólicos que teñan afección no municipio.
