Esta mañá tivo lugar no salón de plenos do Concello a clausura do Obradoiro de Emprego “Salvaterra Emprega III”. Neste acto estiveron presentes a delegada da Xunta en Vigo, Ana Ortiz, a alcaldesa de Salvaterra de Miño, Marta Valcárcel, o equipo directivo e alumnado. Este programa de formación dual impulsado polo Concello de Salvaterra de Miño e en colaboración coa Xunta de Galicia deu emprego a un total de 25 persoas. Ademais, ofreceu formación a 20 cidadanos nas especialidades de forestal e xardinería durante 12 meses.
“Salvaterra Emprega III” é un plan co que se busca fomentar o emprego. Así mesmo, conta cunha financiación de máis de 500.000 euros en colaboración coa Consellería de Promoción o Emprego e Igualdade da Xunta de Galicia. O fin último é mellorar a ocupabilidade das persoas desempregadas do municipio.
A través deste obradoiro, o alumnado traballador adquiriu os coñecementos necesarios mediante a realización de tarefas que responderán á prestación do servizo. Por outra banda, a próxima semana dará comezo «Salvaterra Emprega IV», un novo obradoiro cunha duración prevista de 9 meses. Neste programa preténdese formar a 20 persoas desempregadas nas mesmas especialidades formativas do ámbito Forestal e de Xardinería.
