O Bloque Nacionalista Galego pide acceso ao censo do Centro Municipal de Protección Animal da Madroa «ante as denuncias recibidas pola fronte nacionalista que alertan de sacrificios inxustificados de animais«, tal e como explican nun comunicado. Os nacionalistas alerta así de que «a xestión do recinto volveuse opaca depois a decisión do Goberno de Abel Caballero de privatizar o servizo o pasado 1 de setembro a mans da empresa Servigal».
“O BNG vimos de recibir informacións a nivel cidadá que apuntan a que se poderían estar producindo sacrificios a través do abuso da eutanasia veterinaria, aplicando criterios como o da idade ou a longa estadía do animal no propio refuxio”, advertiu o portavoz municipal do BNG de Vigo, Xabier P. Igrexas.
O voceiro nacionalista indica que se trata dunha situación que de confirmarse «constituiría unha grave vulneración da normativa de benestar animal, tanto da ordenanza municipal como das leis galega e estatal» polo que “o Concello non pode permitir nin tolerar esta práctica cruel”.
Diante destes indicios, o BNG vén de rexistrar a solicitude para que se lle facilite toda a relación de cambios no censo de animales acollidos no refuxio da Madroa dende a entrada de Servigal, así como os certificados de baixa rexistral dos animais sacrificados xunto cos documentos que xustifiquen a aplicación da eutanasia veterinaria.
“Sería aberrante e algo totalmente inaceptábel que nun Centro Municipal de Protección Animal estean a ser sacrificados cans de maneira arbitraria e en contra do previsto legalmente, polo que urximos ao Goberno de Caballero a facilitar toda esa información e a actuar con absoluta firmeza de se confirmar estes gravísimos feitos”, reclamou Igrexas, poñendo en valor a “crecente sensibilidade das viguesas e vigueses en favor dos dereitos e benestar dos animais«.
