Llerena Perozo presenta “Os anos tranquilos” en Tui

A viguesa Llerena Perozo presentará o seu libro “Os anos tranquilos” na Sala Félix Rodríguez este mércores 27 de novembro, ás 19 h, dentro do programa do 25N do Concello de Tui.

“Os anos tranquilos” é a historia vertixinosa dunha muller que, ademais de traballar coas súas mans, pode ser quen de vivir como unha gran señora pola súa capacidade de aprendizaxe e mesmo, cando é preciso, empregar as armas necesarias para matar.

Ela é María García, que nace a comezos do século XX nunha aldea de montaña asturiana. Coa imaxinación, co instinto e coa intelixencia, María sorteará os mares bravíos das normas, vencerá atrancos e prexuízos e superará fronteiras físicas, mentais e sociais.

A autora Llerena Perozo (Vigo) conta cunha traxectoria profesional centrada na
cultura, no medio ambiente e na igualdade. Publicou tres libros de divulgación,
novelas e obras destinadas ao público infantil e xuvenil. É tamén colaboradora
regular en medios de comunicación.

Esta actividade forma parte da campaña “Que a vergoña cambie de lado. A nosa voz, contra as violencias machistas!” organizada polo Concello de Tui para
conmemorar o 25N, o Día Internacional de Eliminación da Violencia contra a Muller.

Completando a programación, este sábado día 30 desenvolverase no Mercado
de San Antonio a acción performativa “Corazón” de Iria Sobrado.