As xornalistas Macarena Baena Garrido e Laura de Grado Alonso son as gañadoras do IV Premio Sesé Mateo de Xornalismo Ético pola súa reportaxe “Desprotexidas. A realidade das mulleres migrantes vítimas de violencia de xénero en España”. O traballo foi publicado na web Efeminista, da axencia EFE. Trátase dunha ampla reportaxe que inclúe vídeos con testemuños de mulleres de diferentes nacionalidades. Este traballo denuncia “a situación de vulnerabilidade destas mulleres migrantes. Ademais de sufrir violencia de xénero son tamén vítimas de violencia institucional, racismo e unha desprotección sistemática pola súa situación irregular”. Así mesmo, a reportaxe ofrece tamén a visión de expertas que propoñen solucións.
A concelleira de Igualdade, Iria Vilaboa, sinala que o traballo elixido polo xurado pon o foco nas propias vítimas. Ademais, asegura que son “Mulleres invisibles que sofren marxinación e violencia polo feito de ser mulleres. Isto agrávase pola súa condición de estranxeiras e sen recursos”. A alcaldesa, Digna Rivas, lembra que estes premios naceron co obxectivo de recoñecer “a ética á hora de tratar información relacionada coa violencia machista. Tamén que evita o sensacionalismo, e iso é o que fai esta reportaxe que dá voz ás propias vítimas”.
As xornalistas da Axencia EFE, Macarena Baena e Laura de Grado, afirman que a súa responsabilidade “é dar visibilidade a aquelas voces que sistematicamente foron silenciadas”. A través desta reportaxe “queriamos que estas mulleres se convertesen nas donas da súa propia historia, narrándoas en toda a súa complexidade”. As autoras agradecen “a confianza e valentía” destas mulleres ao participar neste proxecto “co obxectivo común de que ningunha outra muller teña que vivir o que elas viviron”. Advirten que “a falta de acceso a recursos, o racismo, a discriminación, a desconfianza nas institucións e a lei de estranxeiría colócaas nunha posición de extrema vulnerabilidade”.
IV Premio Sesé Mateo de Xornalismo Ético
O xurado estivo formado polas xornalistas Cristina García (CRTVG) gañadora do II Premio Sesé Mateo e Ana González Liste (A Praza) gañadora do III Premio Sesé Mateo. Tamén participaron Laura Nogueira (Atlántico Diario) e María Xesús Queimaliños (Radio Redondela).
O premio está dotado en 1.500 euros e unha escultura en bronce feita pola asociación Lenda. As premiadas recollerano nun acto que se celebrará este sábado, día 23, na Oficina de Turismo de Redondela ás 12.00 horas. Celebrarase tamén unha charla-coloquio baixo o título “Os medios de comunicación como axentes do cambio” con Ana González Liste, Diana López Varela (xornalista, guionista e escritora) e Joshua Alonso Mateo, Técnico superior en Promoción da Igualdade de Género. Haberá unha lectura de poemas do libro de Sesé Mateo “Polo camiño do vento” a cargo de Mar Núñez.
