Vera Rodríguez Sanjuan, a nova promesa do ciclismo de dez anos e corredora do equipo Master da Louriña, conquistou o Campionato de España de Pumptrack 2024. Este celebrouse no circuíto de Torrevieja, en Alicante. A deportista, que xa deixara a súa pegada no mundo do pumptrack, impúxose cun tempo de 23,674. Superou á segunda clasificada por apenas 175 milésimas, nunha proba que estivo marcada pola dificultade das condicións meteorolóxicas.
O evento tivo lugar no circuíto asfaltado máis grande do mundo. Disputouse baixo condicións complicadas, coa pista mollada debido á choiva e varios paróns polo perigo que representaban as caídas e os resbalóns. De feito, a organización tivo que suspender a segunda manga do campionato debido á tormenta. A pesar dos contratempos, Vera demostrou a súa destreza neste esixente deporte, ao que se lle sumou a presión de competir nunha soa manga.
Este logro é só o último dunha serie de éxitos que consolidaron a Vera Rodríguez como unha das maiores promesas do pumptrack e outras disciplinas do ciclismo. En 2023, logrou o bronce no Campionato de España de Pumptrack na categoría principiante feminina. A nivel rexional, alzouse coa vitoria no Campionato e a Copa Galega de Pumptrack, onde permaneceu invicta durante toda a tempada.
Tempada 2024
Ao longo deste ano, dominou as competicións desta disciplina, gañando seis das sete carreiras nas que participou e alcanzando os postos de podio nas competicións Scratch femininas. A súa capacidade para adaptarse a diferentes modalidades de ciclismo foi clave para o seu éxito, destacándose tamén en disciplinas como estrada, montaña e descenso.
O pumptrack, que está en auxe como modalidade deportiva, consiste nun circuíto curto con curvas, saltos e desniveis, no que os ciclistas deben avanzar rapidamente mediante o bombeo do corpo en lugar de pedaleo. Esta técnica require dunha gran habilidade e precisión, algo que Vera perfeccionou co tempo, destacándose en cada unha das competicións nas que participou.
