O próximo sábado 16 de novembro chega a Ponteareas o espectáculo de maxia do Mago Teto, Rock ‘n’ Magic. A función terá lugar no Auditorio Reveriano Soutullo ás 19:00h e as entradas teñen un prezo de tres euros por persoa.
O show promete «ser máis que un espectáculo de maxia» xa que o Mago Teto, acompañado de Fer Risco á batería e Mon Orencio á guitarra, construirán un espectáculo onde a maxia convivirá coa música a traves dalgúns dos clásicos do rock and roll.
«Unha gran posta en escena, unha iluminación espectacular, participación do público, humor, maxia son os elementos que fan de Rock and Magic un espectáculo único, posiblemente a experiencia teatral máis parecida a un concerto de rock» aseguran dende a dirección do show.
A venda de entradas está dispoñible na Biblioteca Municipal do 11 ao 15 de novembro de 10:00h a 14:30h ou ben no despacho de billetes do auditorio no propio día da función de 17:30h a 19:00h.
