O Porriño acolleu hoxe a presentación do Obradoiro de Emprego “O Noso Encontro co Emprego”, un innovador programa de formación e emprego dirixido a mozos menores de 30 anos. O evento, que tivo lugar nas instalacións de Porremprego, contou coa participación do alcalde de Porriño, Alejandro Lorenzo, e a delegada territorial da Xunta en Vigo, Ana Ortiz. Así mesmo, estiveron acompañados polo director territorial de Emprego, José Antonio Rodríguez, e a directora do Obradoiro, Begoña Echegaray.
Este novo programa require un investimento total de máis de 480.000 euros e financiarase principalmente a través da Consellería de Emprego, Comercio e Emigración da Xunta de Galicia, con 439.000 euros. A esta cuantía súmase unha achega municipal de 45.000 euros. Un total de 16 alumnos-traballadores beneficiaranse desta formación, divididos en dúas especialidades: albanelaría urbanización e carpintería, con oito participantes en cada unha.
Os alumnos de carpintería poñerán en práctica os seus coñecementos reparando tres pasarelas no Paseo do Louro, mellorando así a accesibilidade na senda peonil que bordea o río. En canto aos futuros albaneis, encargaranse dos labores de urbanización e pintura na rúa Paralela 3 do Polígono Industrial da Granxa, onde se executarán novas beirarrúas.
O Noso Encontro co Emprego
O programa “O Noso Encontro co Emprego” terá unha duración de doce meses. “Representa unha valiosa oportunidade para que os mozos se formen e adquiran experiencia en profesións altamente demandadas no mercado laboral. Deste modo aumentan así as súas posibilidades de inserción laboral”, tal e como trasmitiu o alcalde Alejandro Lorenzo. Ademais, instou aos novos traballadores a “aproveitar ao máximo esta experiencia”, subliñando a importancia do servizo público que brindarán a todo o pobo.
Pola súa banda, a delegada Ana Ortiz, incidiu en que están “ante unha ocasión magnífica para abrir unha ventá ao mercado de traballo, xa que tanto a sociedade como as empresas necesitan xente formada, aí é onde tedes a vosa oportunidade”.
O acto de presentación celebrouse dun xeito especial, xa que os alumnos doutro obradoiro de emprego do Porriño, centrado na especialidade de cociña, ofreceron un almorzo, dando a benvida aos novos compañeiros. Desta forma demostraron, unha vez máis, a súa preparación e habilidades adquiridas tras un ano de formación.
Con esta iniciativa, desde o Concello do Porriño continúan reafirmando o seu compromiso coa creación de emprego e a formación da súa mocidade, sentando as bases para un futuro laboral máis prometedor para todos eles.
