A alcaldesa de Redondela, Digna Rivas, e o concelleiro de Deportes, Iván Valles, visitaron hoxe o CEIP Outeiro das Penas, de Cesantes, onde presentaron as axendas escolares para o curso 2024/25. O Concello agasallou con elas a todo o alumnado de Primaria dos centros públicos do municipio. Son en total 1.300 axendas que acompañarán ás crianzas ao longo de todo o curso. Este ano, as protagonistas son mozas e mulleres de Redondela que destacan no mundo do deporte. Trátase da futbolista Paula Domínguez Encinas, “Pauleta”, a piloto Alba Fernández López, a remeira Antía Domínguez Rodríguez, a ex xogadora e técnica de balonmán Carla Abad Alonso, a árbitra de fútbol Elena Casal Fernández e a árbitra internacional de Taekwondo Conchy Martínez Carballo.
Rivas sinalou que estas seis mulleres “son unha escolma do talento feminino co que conta Redondela no mundo do deporte, e desde o goberno local cremos que é importante visibilizar o seu traballo e os seus éxitos para que sirvan tamén como referente”. Para a alcaldesa é importante que estas axendas “sirvan tamén para fomentar a igualdade de xénero e de oportunidades en todos os eidos e rachar cos estereotipos”.
Na presentación celebrada hoxe participaron tamén dúas das protagonistas destas axendas, Elena Casal e Conchy Martínez, que falaron cos nenos e responderon ás súas preguntas. As dúas árbitras amosáronse “orgullosas” por este recoñecemento á súa traxectoria no mundo do deporte. Para Conchy Martínez “é moi importante poñer en valor o deporte feminino, xa temos avanzado moito en materia de igualdade, pero aínque queda traballo por diante”.
