A Concellería de Infraestruturas do Concello de Ponteareas, que dirixe Raquel Bautista, informou que dende primeira hora da mañá se procedeu a colocar a nova sinalización das fontes públicas. Adianta a concelleira que lamentablemente ás poucas horas unha das fontes xa sufrira accións vandálicas coa retirada do cartel que informa que esa auga non é apta para o consumo humano. Raquel Bautista concreta que ás 09:15 horas desta mañá se colocou a sinalización de “non potable” na fonte ao pé da N-120 á altura de Santiago de Oliveira e poucas horas despois xa desaparecera.
A concelleira tilda estes actos de “moi graves” ao xogar coa saúde das persoas ademais de provocar un gasto innecesario de produción e reiterada colocación de nova sinalización pagada con cartos públicos de todas e todos. Raquel Bautista apela á colaboración cidadá na denuncia de actos vandálicos que destrúan bens públicos e adianta que a Policía Local investigará ata atopar coa persoa responsable.
