Salvaterra de Miño e o seu recinto amurallado acollen o próximo sábado, 7 de setembro, a partir das 18:00 horas o evento final do verán cultural da vila. O novo proxecto de Dramiño Teatro, que leva por título “Tempo Atrás: Unha viaxe pola historia de Salvaterra”, é un paso máis dentro das propostas escénicas que leva ofrecendo o grupo nos seus dous anos e medio de actividade.
Sen perder a orixinalidade que lles caracteriza, pois todas as súas obras son inéditas e escritas por un dos seus integrantes, Ángel Vidal, agora aspiran a ampliar o espazo escénico para ocupar toda a muralla nun roteiro histórico que promete ser “algo nunca visto na nosa vila”.
Fai cousa dunhas semanas, Dramiño publicaba nas súas redes o trailer oficial, filmado pola tamén veciña, Paula Pereira, onde deixaban algunha pista sobre o que poderemos ver próximo sábado. Máis de 40 actores e actrices forman o elenco deste espectáculo inmersivo que ten como obxectivos principais a concienciación, a preservación e a posta en valor do patrimonio e da historia da vila de Salvaterra. A experiencia busca ser o máis personalizada posible, por iso o acceso ao espectáculo realízase mediante grupos. Xa quedan moi poucas plazas dispoñibles para o evento, pero calquera que esté interesado pode anotarse de balde na Biblioteca de Salvaterra de Miño ata completar o aforo.
