Coa dotación, o goberno local completará o financiamento da actuación, que ten un orzamento total de máis de 760.000 euros
A Deputación de Pontevedra acaba de aprobar unha achega de preto de 160.000 euros para que o Concello de Tui reforme a contorna da súa praza de abastos. Unha idea que levaba máis dun ano sen ter ningunha actualización e que agora poderase levar a cabo.
Trátase de recursos que proveñen da liña 1, de investimentos, do Plan +Provincia. Con eles o goberno local poderá completar o financiamento que ascende a 760.000 euros.
En concreto, as actuacións desenvolveranse na intersección das rúas O Pilar e Hermanos Maristas, así como no espazo urbano existente na parcela da praza de abastos. O proxecto busca a mellora desta contorna mediante a renovación de acabados, mobiliario, sinalizacións e iluminación.
Ademais, instalaranse novos servizos como un espazo de gradaría na contorna da praza cuberta, unha zona de recarga de vehículos eléctricos, un área axardinada, unha instalación de aparcamento de bicicletas ou o acondicionamento do espazo dedicado á centralización e clasificación de residuos, entre outros.
No que vai de ano, a Deputación de Pontevedra xa aprobou 41 dos 48,2 millóns de euros do Plan +Provincia, co que, en palabras do presidente, Luis López, “seguimos tendendo pontes cos concellos”.
