O goberno de Vigo abre este mércores, día 14 de agosto, o prazo para pedir as bolsas comedor para o alumnado da cidade, que terán ata o 12 de setembro para solicitalas, co curso escolar xa iniciado. O alcalde, Abel Caballero, anunciou que poderán solicitarse a través da web municipal ou de forma presencial na sede do Concello de 09:00 a 14:00 horas.
O rexedor local volveu a criticar á Xunta, indicando que noutras comunidades son os gobernos autonómicos os que conceden estas axudas. Así mesmo, declarou que «non hai listas de espera», xa que todos os nenos que a soliciten e cumpran cos requisitos, recibirán a bolsa. As solicitudes valóranse segundo a renda per cápita da unidade familiar, priorizando aquelas con menor renda. En caso de igualdade de ingresos, darase prioridade ás familias con maior número de membros.
