Unha muller duns 45 anos apareceu morta este martes pola mañá na parte traseira dun vehículo aparcado na Avenida de Samil, a escasos metros da praia de A Fonte.
Unha viandante deu o aviso, ao decatarse de que na parte traseira do vehículo había unha persoa na mesma postura que o día anterior.
A muller golpeou a ventá, pero ao ver que a persoa de dentro non reaccionaba púxose en contacto co 092. Eran as 11.30 horas cando a Policía Local recibiu o aviso e enviou a dúas dotacións ata o lugar que comprobaron que, efectivamente, había unha muller dentro do coche sen signos de vida.
Ademais da Policía Local desprazáronse ata o lugar a Policía Nacional e unha ambulancia do 061 que estivo apenas uns minutos. Ata a chegada da forense, un equipo estivo a recoller mostras tanto do interior como do exterior do vehículo mentres preto unha decena de axentes precintaban a zona e custodiaban o traballo dos seus compañeiros #ante a curiosa mirada das persoas que paseaban ou acudían á praia.
Non foi ata pasados uns minutos das dúas da tarde cando se produciu o levantamento do cadáver, polo que os axentes levantaron o dispositivo e abandonaron o lugar.
