Gran acollida á peregrinación especial impulsada pola Eurocidade Tui-Valença no marco das Xornadas Europeas do Camiño de Santiago, e que nos meses de maio e xuño percorrerá o trazado oficial portugués do Camiño Portugués da Costa, dende a cidade de Caminha ata Santiago de Compostela.
A poucos días de que comece esta actividade apenas quedan unhas prazas vacantes para as etapas do 24 e 25 de maio, e do 7 e 8 de xuño, e unha para realizar as oito de que consta o camiño completo.
As etapas discorren por paisaxes espectaculares das ribeiras do Miño e lugares de grande valor patrimonial e espiritual:
- 1 de maio: Caminha – Vila Nova de Cerveira (19 km)
- 2 de maio: Vila Nova de Cerveira – Tui (23 km)
- 3 de maio: Tui – O Porriño (23 km)
- 4 de maio: O Porriño – Redondela (22 km)
- 24 de maio: Redondela – Pontevedra (24 km)
- 25 de maio: Pontevedra – Caldas de Reis (23 km)
- 7 de xuño: Caldas de Reis – Padrón (24 km)
- 8 de xuño: Padrón – Santiago de Compostela (25 km)
As persoas interesadas poden inscribirse a través do enlace dispoñible na páxina web do Concello de Tui, no correo electrónico caminhadas.andainas@gmail.com ou no teléfono +351 934 440 770. O prezo é de 12€ por etapa ou 80€ para quen desexe participar en todas as etapas. Inclúe guía acompañante, transporte de mochilas, seguro de asistencia e desprazamentos aos puntos de inicio e fin das etapas.
A concelleira de Turismo de Tui, Ana María Núñez, sinala que esta iniciativa pretende «poñer en valor o trazado histórico do Camiño Portugués da Costa dende Caminha, por Vilanova de Cerveira ata Valença e Tui, tal e como fixeron milleiros de preregrinos ao longo dos séculos».
