O Concello de Ponteareas informa de novos roubos de cable eléctrico, nesta ocasión na estación depuradora municipal da Freixa. Un feito que dende o Concello califican de “moi grave” ao prexudicar o correcto funcionamento da depuradora. Informa o tenente de alcaldesa e concelleiro de Seguridade, Juan Carlos González, que as forzas de seguridade xa están investigando estes feitos que “danan unha infraestrutura indispensable para o tratamento das augas e a protección do medio ambiente”.
Roubos no alumeado público
Ademais, nestes días tamén se produciron roubos de cableado do alumamento público no barrio da Cruz, en Pías, e no Alto da Gloria en Fontenla. “O alumamento público é fundamental para dar seguridade aos barrios do rural. Estes actos vandálicos poñen en risco a seguridade das persoas que van a traballar cedo ou saen dos seus fogares a última hora da tarde ou da noite cando non hai luz natural. Nas parroquias temos xente maior e todas e todos debemos ter a sensibilidade suficiente para pensar que non poden saír a escuras”.
Colaboración cidadá
Novamente o Concello solicita a colaboración cidadá aportando información útil que poida axudar para localizar á persoa responsable e protexer un servicio público como é a depuración de augas e a alumamento público. “A aportación de datos veraces por parte da cidadanía sempre é unha axuda importante por iso solicitamos novamente que comuniquen as súas sospeitas”,
González Carrera recórdalle aos veciños e veciñas que as empresas autorizadas e os servizos do Concello sempre levan vehículos serigrafíados e uniformes de traballo identificativos, “no caso de ver a alguén que non vaia perfectamente identificado manipulando o cableado deben alertar á Policía Local ou Garda Civil”.
