Galicia Suroeste vén de adxudicar a licitación para a creación do “Club do Produto do Agro do Baixo Miño”, o seguinte paso marcado na planificación estratéxica que converterá á comarca nun referente turístico innovador e único a nivel nacional.
Os primeiros pasos iniciados no mes de decembro co sector primario, acadan un novo pulo coa contratación desta asistencia técnica, que garantirá a excelencia en todo o proceso que queda por diante, e que terá como resultado unha oferta turística única, onde o principal elemento de atracción de visitantes e turistas serán as explotacións agrarias coas que conta o territorio.
O club do produto é unha estratexia colaborativa que consistirá nun conxunto de servizos turísticos organizados, que ofrecerán garantías ás persoas consumidoras turistas a través dun sistema de regulamento do propio club. A iniciativa pretende agrupar a produtores, comercializadores e actores do territorio para fomentar a calidade, a sostibilidade e a competitividade dos produtos locais. Con esta creación, o agro incorporarase á cadea de valor do turismo no Xeodestino, e traballarán conxuntamente na promoción e na mellora dos servizos ofertados, poñendo o foco no produto do agro local e nos diversos cultivos que caracterizan á contorna, podendo afirmar que estamos ante a “A Despensa de Galicia”.
A iniciativa, tamén busca fortalecer a identidade do territorio como un espazo de referencia na produción agraria, promovendo o consumo responsable, a valorización dos recursos autóctonos, e dando un paso mais, permitindo ás persoas visitantes e turistas coñecer desde dentro os traballos que se realizan nas distintas explotacións existentes, únicas en Galicia. A súa participación no club permitirá poder visitar e coñecer o traballo agrario da comarca a todas aquelas persoas interesadas.
Sendo pioneiros en Galicia, o territorio contará cunha alianza entre planificadores turísticos, prestadores de servizos, institucións e entes xestoras dos recursos no que se basea o club “agro” para desenvolver coas máximas garantías a creación e a xestión dun novo produto turístico único e inimitable, que ten como principal recurso de atracción, a terra, o seu aproveitamento e ás persoas que viven e traballan polo seu desenvolvemento.
Coa execución deste proxecto, enmarcado dentro do Plan de Sustentabilidade Turística en Destino “A Despensa de Galicia”, financiado con Fondos da Unión Europea – Plan de Recuperación, Transformación e Resiliencia – Next Generation, a entidade e os concellos avanzan para poñer en valor novos recursos, que axuden a desestacionalizar e a redistribuír os fluxos turísticos no territorio, así como xerar un retorno económico da actividade turística noutros sectores xa moi asentados, que potencien un maior desenvolvemento, creen novos postos de traballo, tanto no propio sector primario como noutros sectores que ofrecen actividades complementarias e axuden a fixar poboación no nosos rural.
