O Concello de Ponteareas abre a convocatoria para a selección de patrocinadores das actividades incluídas no Plan Anual de Patrocinio 2025. Ante o aumento do interese que suscitan as actividades organizadas polo Concello e a magnitude que comezan a cobrar, o goberno aprobou esta ordenanza reguladora que foi publicada no BOPPO o pasado 17 de decembro de 2024.
Desde a administración local, indican que «este regulamento abre a posibilidade de colaboración mediante o patrocinio das actividades culturais, turísticas e festivas relacionadas coas Festas de Interese Turístico Internacional do Corpus Christi, coas festas patronais de setembro e coas Festas de Nadal«.
Importe económico ou material necesario
O concelleiro de Facenda, Francisco Represas, explica que esta normativa permitirá unha «aportación transparente e a implicación daquelas persoas físicas e xurídicas que desexan realizar achegas económicas contribuíndo aos gastos das actividades partrocinadas». Informa o edil que ademais do importe monetario tamén se abre a posibilidade de colaborar coa aportación do material necesario para o desenvolvemento das actividades e coa organización directa de todo tipo de actos ou cerimonias protocolarias vinculadas coa actividade patrocinada.
“Polo atractivo da súa programación e pola calidade e sigularidade das propostas nos últimos anos medrou o número de visitantes e turistas que atraen as nosas festividades converténdose en potentes motores culturais, económicos e sociais polo que este goberno seguirá apostando por estas celebracións aos ser beneficiosas tanto para o desfrute das veciñas e veciños como para o resto da cidadanía de fóra de Ponteareas”.
Importe mínimo de 500 euros e 20.000 de máximo
A convocatoria non establece un número de máximo de posibles patrocinadores pero si os criterios de selección valorando a contía económica máis vantaxosa e a calidade técnica da proposta de patrocinio.
Esta ordenanza, que regula como se xestionan os contratos de patrocinio con persoas físicas, empresas ou entidades para financiar proxectos municipais, permite tecer rede con aqueles/as que por compromiso persoal sintan vínculos especiais con estas festividades e contribúe a cofinanciar os gastos. A convocatoria para o 2025 establece un importe mínimo por entidade patrocinadora e actividade de 500 euros e un máximo de 20.000 euros.
Orzamento por festas
Polo impacto e repercusión que teñen dentro e fóra do Concello de Ponteareas o goberno abre o patrocinio das Festas de Corpus Christi, declaradas como Ben de Interese Cultural Inmaterial; das Festas de Setembro e das Festas do Nadal. Na convocatoria o Concello fai unha estimación de gasto máximo e enumera os eventos máis salientables en canto ao número de público que atraen e relevancia cultural. Deste xeito, estima un orzamento máximo de 100.000€ para as Festas de Nadal, un orzamento total de 350.000 euros para as Festas de Corpus Christi con actividades a desenvolver entre o 1 de maio e o 30 de xuño; o patrocionio e un orzamento de 200.000€ para as Festas de Setembro, as Festas da Virxe dos Remedios e as Festas de San Miguel, na que se producen importantes citas culturais como o Concurso de Gaitas do País ou a Feira dos Remedios.
Convocatoria aberta todo o ano
O Concello informa que quedará aberta ao longo de todo o ano para recibir as propostas de persoas físicas, empresas ou entidades. O patrocinio co/s patrocinador/s seleccionado/s formalizarase mediante a sinatura do correspondente convenio de patrocinio.
