A Xunta recoñece a traxectoria de Sargadelos como referente industrial e cultural e confía en que, co esforzo de todas as partes, se atopen vías que permitan a súa continuidade, garantindo o mantemento dos postos de traballo, o cumprimento da lexislación vixente e a conservación e promoción do patrimonio cultural. Así o vén de explicar a administración autonómica nun comunicado no que indica que a Inspección de Traballo e Seguridade Social actúa para garantir o cumprimento das medidas de riscos laborais, que son un deber para todos os centros de traballo.
Sanción de 5.000 euros
O expediente mencionado pola propiedade da empresa atópase nunha fase inicial, aínda non é firme e implicaría unha posible sanción de 5.000 euros ademais da corrección de determinados defectos. Ningunha destas medidas aboca ao peche da planta.
A Xunta de Galicia indica que «o cumprimento da lexislación de seguridade laboral non é un obstáculo para a actividade dunha empresa, senón unha garantía para que esta poida desenvolver a súa labor nun entorno seguro e adecuado para a saúde dos traballadores, neste caso e en calquera outro».
Colaboración
O Goberno galego entende que a adaptación a determinados requisitos «pode supoñer un reto, especialmente en instalacións de alto valor patrimonial como as de Sargadelos no concello de Cervo, que son Ben de Interese Cultural desde 2014». Por iso, reafirma a súa disposición para colaborar e asesorar na busca de solucións que permitan manter e seguir impulsando a actividade industrial dentro do cumprimento da normativa.
