A Xunta publica hoxe a licitación, cun orzamento que rolda os 445.000 euros, da redacción do proxecto e da dirección de obra para a construción en Vigo dun edificio de aloxamentos compartidos e temporais en alugueiro accesible, destinado a mozos e mozas menores de 36 anos.
Prazo para presentar ofertas
O prazo para presentar ofertas será ata o 2 de xuño. Así o anunciou hoxe en Vigo a conselleira de Vivenda e Planificación de Infraestruturas, María M. Allegue, xunto co conselleiro de Cultura, Lingua e Xuventude, José López Campos, e a delegada territorial da Xunta en Vigo, Ana Ortiz. No acto tamén estiveron presentes o Secretario Xeral de Vivenda e Urbanismo, Heriberto García Porto, e a directora xeral de Xuventude, Lara Meneses.
80 aloxamentos
O inmoble, que albergará 80 aloxamentos, situarase na parcela M-V-6 de San Paio de Navia, e contará tamén cunha sala para estudo ou teletraballo e unha zona de usos múltiples para reunións ou actividades diversas como ximnasio ou a celebración de eventos. Tamén estará dotado dun espazo de lavandería e garaxes.
Os mozos e mozas menores de 36 anos disporán dun prazo de permanencia de ata tres anos. Así, o Goberno galego, con esta solución pioneira, busca dar facilidades ás necesidades de emancipación da xente nova que accede ao seu primeiro traballo ou que está a percibir bolsas de formación ou de investigación, xa que, en palabras de Allegue, «son o noso futuro e temos que garantir que poidan comezar a súa vida adulta nun fogar digno, de calidade e a prezos accesibles ás súas posibilidades».
Axudas para a xente nova
A titular de Vivenda e Planificación de Infraestruturas lembrou que a Xunta ten axudas destinadas á xente nova galega abertas neste momento, como é o caso da liña destinada á adquisición de vivenda, con até 20.000€ de achega para menores de 36 anos ou os avales á compra. Allegue tamén destacou que a Xunta está a reservar para este colectivo o 25% para venda e o 40% para alugueiro nas novas promocións públicas.
Pola súa banda, o conselleiro de Cultura, Lingua e Xuventude, José López Campos, reiterou unha vez máis a importancia «das políticas transversais da Xunta, que son a mellor maneira de axudar aos máis novos a progresar en distintas vertentes, neste caso facilitándolles o acceso á vivenda». Neste sentido, mostrou a súa alegría por sumar novos pisos aos xa anunciados en Santiago «espallando esta opción por diversos puntos de Galicia».
Tamén lembrou outra das medidas postas en marcha a través da Dirección Xeral de Xuventude, o Bono Emancípate, que con 3.300 solicitudes recibidas e co prazo de solicitude aberto aínda ata o día 30 deste mes de abril «é outra forma de incentivar á xente nova a independizarse, con axudas para os primeiros gastos do fogar como o mobiliario ou xestións de contratos, tanto en réxime de alugueiro como en propiedade».
O segundo en Galicia
Este inmoble de aloxamentos compartidos é o segundo que a Xunta impulsa en Galicia, como solución habitacional transitoria para mozos e mozas. O primeiro, pendente de adxudicación do proxecto e dirección e obra, está situado en Santiago, en Xoán XXII, e disporá de 60 prazas. O Goberno galego prevé que Lugo sexa a cidade na que se constrúa o terceiro destes inmobles.
Allegue destaca o forte compromiso da Xunta coa vivenda en Vigo, poñendo como exemplo Navia, barrio no que o Goberno galego leva investido 132M€, dos que 15,6M€ son fondos europeos, o que representa o 11%. A conselleira destacou, neste sentido, que Galicia é unha comunidade cumpridora e que ten executado o 100% dos fondos MRR que se lle habían asignado para vivenda ata agora.
Por outra banda, a titular de Vivenda e Planificación de Infraestruturas puxo en valor os Proxectos de Interese Autonómico para habilitar solo no ámbito Ofimático para 2300 vivendas, por un importe de 355.511,31€ e que está a punto de adxudicarse, e o da zona de Ramón Nieto para 1300, que sairá mañá a licitación por un importe de 333.624€.
