O Concello de Ponteareas informa que o centro de saúde amplía os seus servizos para administrar tratamentos de hematoloxía aos pacientes crónicos.
A xerencia de Sanidade de Vigo explica que coa intención de avanzar no seu plan de humanización, o servizo de Hematoloxía quere achegar a administración de tratamentos crónicos aos seus pacientes. Por este motivo, a partir do venres día 4 estenderá o programa de Unidades Móbiles de Quimioterapia Ambulatoria ao SAP de Ponteareas facilitando o acceso aos usuarios de Ponteareas, As Neves, Mondariz, Mondariz Balneario, Covelo e Salvatierra.
A concelleira de Benestar Social, Raquel Plana, salienta a importancia de contar con este servizo que «evitará desprazamentos e permitirá que os pacientes regresen a casa despois da sesión, buscando comodidade e calidade de vida sen comprometer a efectividade do tratamento».
