O alumnado do obradoiro «O Noso Encontro co Emprego» comeza a reparación das pasarelas sobre o río Louro

Comezan a verse xa os primeiros resultados efectivos do alumnado do obradoiro “O Noso Encontro co Emprego” posto en marcha polo Concello do Porriño e do que participan 16 persoas menores de 30 anos.

Este grupo de xente moza, homes e mulleres, iniciaba esta nova etapa formativa e de emprego o pasado mes de outubro con clases teóricas e prácticas no Multiusos de Torneiros. Trátase dun programa mixto destinado á mellora da empregabilidade que alterna a formación para emprego con práctica laboral, con traballo en obra real.

Deste xeito, unha vez adquiridos os coñecementos necesarios, atópanse agora na fase de plasmar todo o aprendido na aula coa posta en marcha de actuacións en beneficio do pobo. Neste caso en concreto, comezaron a reparar unha das tres pasarelas de madeira sobre o Louro que une dous puntos do paseo, mellorando así a accesibilidade na senda que bordea o río, transitada a diario por centos de persoas.

“Este programa representa unha valiosa oportunidade para que a nosa mocidade se forme en profesións altamente demandadas no mercado laboral, aumentando así as súas posibilidades de inserción laboral, á vez que coa posta en práctica dos coñecementos adquiridos contribúen, neste caso, á mellora de infraestruturas municipais de uso público”, sinala o alcalde Alejandro Lorenzo.

O rexedor instábaos a todos eles na inauguración do obradoiro “a aproveitar ao máximo esta experiencia” e as declaracións dos propios alumnos-traballadores son boa mostra de que así o están a facer. “Estamos aprendendo moito, un séntense ben ao rematar un proxecto, ver como constrúes algo e deixas unha pegada que perdura no tempo”, sinala un dos participantes deste obradoiro, co que coincide unha compañeira que asegura estar “contenta e satisfeita. A maiores de estudiar, poñemos en práctica os coñecementos mediante a realización dunha obra en beneficio de toda a veciñanza”.

A todos eles quédalles por diante aínda varios meses ata rematar o programa que consta dun ano de duración. Con iniciativas como esta, desde o Concello do Porriño continúan reafirmando o seu compromiso coa creación de emprego e a formación da mocidade, “sentando as bases para un futuro laboral máis prometedor”. Xunto con esta especialidade de carpintería de madeira desenvólvese outra de albanelería, cuxa parte práctica céntrase na urbanización e pintura na rúa Paralela 3 do Polígono Industrial da Granxa, onde se executarán novas beirarrúas. “O Noso Encontro co Emprego” supón unha inversión de máis de 480.000 euros dos cales 439.000 son subvencionados pola Consellería de Emprego, Comercio e Emigración da Xunta de Galicia, cubríndose a parte restante cunha achega municipal.