A Semana Santa tudense presenta novidades neste 2025 coa incorporación dun novo acto procesional na xornada do Xoves Santo. Así se deu a coñecer esta mañá na presentación programación da Semana Santa 2025 na casa do concello que contou coa participación do alcalde, Enrique Cabaleiro, a concelleira de Cultura, Sonsoles Vicente, a presidenta da Irmandade do Doce Nome de Xesús e Santa Casa da Misericordia, Begoña Martínez Lorenzo, o presidente da Asociación de Exvoluntarios de Protección Civil de Tui – Cristo da Agonía, Juan Juan Sío Castro, e o prior da Irmandade, párroco de Tui e cóengo da Catedral, D. Santiago Freire Comesaña.
O alcalde de Tui, Enrique Cabaleiro, destacou as dimensión da Semana Santa tudense “na posta en valor do noso patrimonio cultural” e no feito de ser “un elemento de potenciación do noso sector turístico, sen esquecer que a finalidade primeira da celebración da Semana Santa e a súa dimensión espiritual”. Enrique Cabaleiro referiuse tamén ao lugar preeminente e de liderato que a Semana Santa de Tui ten.
Pola súa banda a concelleira de Cultura de Tui, Sonsoles Vicente, salientaba a importancia e singularidade da Semana Santa tudense. Do mesmo xeito que o alcalde referiuse ao compromiso inequívoco do Concello con esta celebración, coma se reflicte na edición dun libro de 16 páxinas no que se recollen non so os distintos actos previstos senón tamén a historia da Semana Santa tudense. Así coma na organización, por parte do Concello, da procesión do Santo Enterro o Venres Santo. Agradeceu a colaboración de todas as entidades e persoas que fan posible levar a cabo esta programación, salientando precisamente a importancia desta colaboración.
Programa
O programa da Semana Santa abrirase este domingo, 6 de abril, ás 18 h na capela das Reliquias na Catedral coa lectura do pregón a cargo do bispo emérito da diocese de Tui-Vligo, D. Luis Quinteiro Fiuza. Hoxe na presentación Dolores Balseiro, representante da Asociación Amigos da Catedral, referíase a este pregón e ás singularidades da Semana Santa tudense.
Mentres o presidente da Asociación de Exvoluntarios de Protección Civil de Tui – Cristo da Agonía, José Juan Sío Castro, manifestaba a súa satisfacción por portar, dende hai 32 anos a imaxe do Santo Cristo da Agonía, para o que precisan 24 voluntarios polas dimensións e peso do paso.
Novidade
A presidenta da Irmandade do Doce Nome de Xesús e Santa Casa da Misericordia, Begoña Martínez Lorenzo, foi a encargada de anunciar a novidade deste ano que será a celebración da Procesión da Oración do Señor na horta das Oliveiras , que terá lugar o Xoves Santo, ás 21.30 horas.
Por último o prior da Irmandade, párroco de Tui e cóengo da Catedral, D. Santiago Freire Comesaña, destacaba a colaboración existente entre as distintas entidades organizadoras da Semana Santa e adiantaba que todas as celebracións litúrxicas van ser presididas ou polo bispo titular, Don Antonio Valín ou polo bispo emérito, Don Luis Quinteiro.
O programa da Semana Santa en Tui comeza este domingo, ás 18 h na capela das Reliquias na Catedral, co pregón da Semana Santa a cargo do bispo emérito, D. Luis Quinteiro Fiuza. O acto, organizado pola Asociación Amigos da Catedral, contará cun pequeno concerto a cargo do Conservatorio Profesional de Música de Tui.
O domingo 13 de abril, Domingo de Ramos, ás 11 h terá lugar a beizón de ramos na Praza de San Fernando con procesión e misa na Catedral. O mércores, 16 de abril, ás 12 h na Catedral o bispo D. Antonio Valín, presidirá a misa crismal.
O Xoves Santo, 17 de abril, de 19 a 23 h realizarase a tradicional visita aos monumentos cun percorrido pola Catedral, a igrexa das Monxas Clarisas, a igrexa de San Telmo, a capela da Residencia San Telmo, a igrexa de San Domingos e a igrexa de San Bartolomeu. Na Capela da Misericordia visítase a representación do Horto das Oliveiras.
Coma novidade este ano ás 21.30 h celebrarase a procesión da Oración do Señor no Horto das Oliveiras que sairá dende a Capela da Misericordia para percorrer as rúas do conxunto histórico baixo a organización da Irmandade do Doce Nome de Xesús e Santa Casa da Misericordia.
O Venres Santo, 18 de abril, o programa abrirase ás 11 h coa saída dos pasos dende a Capela da Misericordia até a praza de San Fernando onde terá lugar o Sermón do Encontro a cargo de D. Santiago Freire, coengo e párroco de Tui, para continuar a procesión dos Pasos polas rúas da cidade. Estes actos están organizados pola Irmandade do Doce Nome de Xesús e Santa Casa da Misericordia contando coa colaboración Asociación de Exvoluntarios de Protección Civil de Tui – Cristo da Agonía. Mentres ás 20 h, na igrexa de San Domingos terá lugar o Sermón do Desencravo a cargo de D. Santiago Freire. Logo comezará a procesión do Santo Enterro, organizada polo Concello de Tui coa colaboración da Irmandade do Doce Nome de Xesús e Santa Casa da Misericordia, que rematará na igrexa de San Francisco.
O sábado, ás 8 h, sairá da igrexa de San Francisco até a Catedral a procesión de Nosa Señora da Soidade. Por último o domingo ás 12 h o bispo da diocese presidirá na Catedral a Misa Pascual.
A Semana Santa tudense conta cunha tradición secular existindo referencias á mesma en textos do século XIII.
