A Deputación de Lugo abrirá mañá o prazo para inscribirse nas novas actividades gratuítas que organiza a institución provincial para fomentar o lecer saudable e a educación ambiental na Reserva da Biosfera Terras do Miño. A programación arrancará o vindeiro luns, 7 de abril, inclúe un total de 15 propostas de lecer saudable e educación ambiental dirixidas a un público adulto, infantil e familiar que se desenvolverán ata primeiros de xullo no Centro de Interpretación Terras do Miño.
Obradoiros de madeira e modo robótica
Artesanía en madeira con flores secas será o primeiro obradoiro deste segundo trimestre de actividades que estará dirixido a un público adulto. Os participantes aprenderán a realizar unha cúpula floral con base de madeira, un xogo de dous colgantes florais en madeira e a creación dunha letra decorativa de flores secas. Nestes mesmo mes está previsto tamén un taller de Moda robótica e intelixente dirixido a nenos e nenas de 6 a 12 anos que combina moda tecnolóxica, robótica e intelixencia artificial.
Tamén durante o mes de abril haberá unha actividade dirixida aos adultos de Métodos de propagación vexetal na que os participantes aprenderán pautas para propagar e multiplicar plantas. Ademais entre abril e maio o público adulto poderá aprender como fabricar un tear no curso de Fabricación de teares.
Ioga e risoterapia
En maio o Centro de Interpretación será escenario de diferentes actividades deportivas como ximnasia de mantemento, ioga, risoterapia e estimulación cognitiva, os adultos poderán seguir estas actividades apuntándose á proposta O deporte en Terras do Miño, que terá dúas quendas. Ademais este mes haberá unha actividade de Novas tendencias contemporáneas na arte floral, para a elaboración de arranxos florais, e outra de Reutilización creativa na que os participantes traballarán con plásticos e materiais de refugallo.
Tear e encadernación
Tear con bastidor será a primeira actividade do mes de xuño e será un curso de iniciación no tear para os participantes. Tamén haberá unha actividade familiar para concienciar sobre o uso excesivo de plásticos que consistirá na creación dun marcapáxinas con este material reciclado e elementos da natureza, Poñer fin á contaminación por plásticos.
En xuño tamén haberá unha actividade de Iniciación á encadernación; outros dous de ioga, un co obxectivo de Reconectar co medio natural e outro de Ioga en familia. Os nenos e nenas poderán participar nun taller de Xogos de verán no que aprenderán a facer bombas de sementes, a preparar o San Xoan ou descubrir a contorna do río Rato; e noutro para a creación de instrumentos a través da reutilización de materiais baixo o nome de Dende a reciclaxe á creación musical.
Inscricións
As persoas interesadas poderán formalizar a súa inscrición a través das diferentes canles dispoñibles, chamando ao número de teléfono 982 227 812 e 982 305 930, enviando un correo electrónico a und.medioambiente@deputacionlugo.org ou a través da web.
