A Sala de Exposicións Municipal de Tui acollerá este xoves 27 de abril a presentación do libro de Carmen Blanco Sanjujo «Gorriones y halcones. El viento en la piedra». O evento dará comezo ás 19:30h.
O libro trátase dunha novela histórica que narra as complexas relacións das familias nobres galegas do século XV, entre elas os Soutomaior asentados en Tui e no sur de Galicia, no contexto da sublevación irmandiña e dos intricados conflitos dunha época de grandes cambios sociais e loitas de poder.
Na presentación, organizada pola Librería Nobel de Tui coa colaboración da Biblioteca Municipal, intervirán a autora do libro, Carmen Blanco, o historiador e secretario do Instituto de Estudios Tudenses, Rafael Sánchez Bargiela, e os actores Tania Villamarín e José Blanco, que representaron escenas da propia obra.
«A Revolta Irmandiña podería ser comparable coa Revolución Francesa ou coa Revolta dos Comuneiros de Castela, pero a historia nunca se contou ben» comenta a autora. Durante máis de cinco anos, Carmen Blanco quixo empaparse da historia de Galicia, visitando os lugares clave da novela, informándose a través de historiadores e lendo todo tipo de documentos da época. A relevancia do papel da muller na sociedade medieval é un dos aspectos que máis lle chamou a atención pois «a muller ten un papel moito máis protagonista do que se nos quere facer crer», sostén.
Carmen Blanco Sanjurjo (Ferrol, 1963) é licenciada en Dereito pola Universidade de Santiago, despois de exercer en Santiago, Madrid e Sevilla como avogada, regresa a Galicia para traballar en diversas empresas privadas. Desde fai once anos xestiona un negocio familiar: a Taberna de Caaveiro, situada no propio mosteiro de Caaveiro, en pleno corazón do parque natural Fragas do Eume.
Formada como actriz e dramaturga na Escola de Teatro de Narón, escribe, interpreta e dirixe numerosas obras teatrais, recibindo o premio de teatro infantil O Facho pola súa obra “A Fuga” e o premio de Teatro Radiofónico de RTVG pola obra “A primeira vez”. Despois dun labor de investigación e escritura de case cinco anos, Gorriones y Halcones é a súa primeira incursión na novela histórica.
