A sociedade mercantil estatal Augas das Concas de España (ACUAES), do Ministerio para a Transición Ecolóxica e o Reto Demográfico, iniciou a posta en marcha da depuradora de A Moscadeira en Ponteareas, que se prolongará durante 6 meses.
A EDAR, que dá servizo a unha poboación de 20.000 habitantes equivalentes, permitirá cumprir coas condicións de vertido ao río Tea, «poñendo fin aos problemas de depuración que padece o Concello desde fai décadas e que deron lugar á imposición de sancións por incumprir os obxectivos de depuración esixidos pola Directiva europea», segundo indican desde o Ministerio para a Transición Ecolóxica nun comunicado de prensa.
Agora, «finalizada esta fase de posta en marcha, en setembro de 2025, o Concello de Ponteareas asumirá a xestión da explotación».
A actuación desenvolvida por ACUAES en Ponteareas consistiu na ampliación e reforma da EDAR de A Moscadeira, mediante a rehabilitación e ampliación da obra de chegada e pretratamento; ampliación da capacidade de tratamento do reactor biolóxico; execución dun segundo decantador secundario e a adaptación da liña de auga ao novo caudal máximo previsto de entrada á planta de 67.392 m³/día.
Co inicio da posta en marcha das novas instalacións comezarase a demolición dos elementos da antiga EDAR que quedan fóra de servizo: (edificio de control e liña de tratamento de fangos) e a renovación e substitución dos equipos electromecánicos da decantación e do reactor biolóxico da antiga planta que se integran como parte das novas instalacións.
Xunto á depuradora, actuouse no sistema de saneamento do Concello coa construción dos Colectores Perimetral Norte e Perimetral Sur e procederase á limpeza e rehabilitación do último tramo do Colector Interceptor do Río Xinzo, incorporando un novo pozo de bombeo ata a depuradora.
En total investíronse arredor de 14 millóns de euros (IVA incluído), que serán cofinanciados, nun 50%, con fondos FEDER, tramo estatal, dentro do Programa Operativo Plurirregional de España (POPE), sendo a achega do Concello de Ponteareas do 30%, mentres que a Consellería de Medio Ambiente e Cambio Climático, antes Consellería de Infraestruturas e Mobilidade, da Xunta de Galicia financiará o 20% restante, en virtude do convenio asinado o 28 de xaneiro de 2022 para a execución, financiamento e explotación das obras.
