O vindeiro mércores 26 de marzo, ás 9.00 horas, abrirase o prazo de reserva de prazas para participar nas sesións de abril, maio e xuño da actividade «Aventura coas focas», unha proposta de divulgación científica desenvolta polo Aquarium Finisterrae, que lles permite ás persoas asistentes coñeceren de preto o traballo de coidado e alimentación das focas grises do centro.
A iniciativa forma parte da programación de fin de semana do museo coruñés e ofrece unha experiencia directa con mamíferos mariños que combina aprendizaxe e sensibilización.
Está dirixida a persoas maiores de 7 anos e ofrece a posibilidade de participar na preparación dos alimentos, así como de acceder ás plataformas exteriores nas que se realiza a alimentación e revisión sanitaria dos animais.
Durante o segundo trimestre do ano, levaranse a cabo 18 sesións, cun total de 216 prazas dispoñibles. Cada sesión conta cun capacidade limitada de 12 participantes, debido ás características específicas da actividade.
«Aventura coas focas» non supón ningún custo adicional ao prezo de entrada ao recinto, pero require a reserva previa de praza para todas as persoas asistentes. As/os menores deben ir acompañadas/os por unha persoa adulta, que poderá responsabilizarse de até dous nenos ou nenas.
Reservas
As reservas poderán realizarse a través da plataforma en liña do servizo de ticketing municipal, dispoñible na seguinte ligazón: https://ticketing.coruna.gal/mc2/acf/
