Salvaterra de Miño celebrará o seu entroido o vindeiro sábado 15 de marzo. Tras aplazar, por mor da choiva, o Enterro da Lamprea axendado para o pasado 8 de marzo, a vila soterrará á súa gran protagonista este sábado día 15.
Ás 16:30h comezará o desfile de comparsas presidido pola comitiva fúnebre que acompañará á lamprea ata a Praza do Concello. Dende o goberno local recordan «que toda persoa que queira formar parte da comitiva, poderá facelo e deberá acudir de rigoroso loito».
Así, máis de 1500 persoas percorrerán as principais rúas da vila amosando os seus bailes ao ritmo da música. Ao remate, na Praza do Concello, procederase á lectura do testamento e á queima da gran protagonista, a lamprea.
