O Concello do Porriño vén de anunciar a que será a pregoeira das festas do Entroido 2025 no municipio. Carla Marqués, gañadora do IV Concurso Escolar de Carteles de Entroido e alumna de 4º da ESO do Colexio Santo Tomás, foi elexida como encargada de realizar o pregón e a súa ilustración será a protagonista do cartel da programación do entroido.
O certame contou cunha gran participación dos centros escolares do municipio, que presentaron as súas propostas en diversos estilos pictóricos como acuarelas, cera ou carbón.
O xurado estaba conformado poos artistas locais Juan de la Cruz Castaño Vicente, Nito Pereiro Oliveira e Nuria Vilanova Ferreira. Os tres foron os encargados de avaliar as propostas recibidas, tendo en conta a diversidade e a calidade das obras.
Todos os carteis presentados ao concurso serán expostos no Centro Cultural Municipal ao longo das festas do Entroido.
A lectura do pregón terá lugar o sábado 1 de marzo ás 13:00h onde a pregoeira, Carla Marqués, estará acompañada polo resto de escolares clasificados nas diferentes categorías, rapaces e rapazas de entre 6 e 17 anos.
Programación do Entroido 2025 no Porriño
O pregón dará o pistoletazo de saída, o sábado 1 de marzo ás 13:00h. A continuación, as charangas Vai de Baile e Noroeste, xunto cos xigantes e cabezudos animarán as rúas do centro da vila dende o mediodía.
Pola tarde, haberá un obradoiro infantil e volverá o histórico Xogo da Ola. A música de charanga amenizará a festa ata o inicio do primeiro dos desfiles de comparsas, que será ás 18.30 horas.
Xa pola noite, na praza Arquitecto Antonio Palacios, concertos de Gin Toni’s, Henry Méndez e Samu Pexe.
O domingo día 2 de marzo 17.00 a 20.00 horas, na praza Arquitecto Antonio Palacios, festa infantil con inchables e obradoiros de temática do Entroido e partir das 19.00 horas, actuación da orquestra París de Noia.
Para o luns 3 de marzo, ao igual que para o martes e mércores, xornadas non lectivas nos centros escolares, haberá campamento en horario de mañá coa finalidade de axudar ás familias a conciliar.
Ademais, o luns ás 17.00 horas, na praza Arquitecto Antonio Palacios, haberá de novo un obradoiro infantil.
O martes 4 de marzo comezará coa animación de rúa a cargo das charangas Imperiais e Fanfarria Furruxa, de 12.00 a 14.00 horas. Xa pola tarde, a partir das 18.30 horas, novo desfile de comparsas.
Por último, o mércores 5 de marzo terá lugar a despedida do entroido co Enterro da Sardiña.
O velorio dará comezo ás 17.00 horas no Círculo Recreativo Cultural, dende onde, unha hora máis tarde, partirá a comitiva fúnebre.
Chegada esta á praza Arquitecto Antonio Palacios, sobre as 19.00 horas, procederase á lectura do testamento, tralo cal terá lugar o pasarrúas “Les Tambours de Feu”, da compañía Deabru Beltzak, para finalmente continuar coa sardiña ata a ponte do Valo sobre río Louro, percorrido amenizado polas Prañideiras e as charangas Imperiais e Anchoa.
