A Xunta de Galicia e o Concello de Mos veñen de asinar un convenio de colaboración co fin de remodelar as avenidas de Puxeiros e do Rebullón cun investimento conxunto de 1,3 millóns de euros.
Así o fixeron constar a conselleira de Vivenda e Planificación de Infraestruturas, María Martínez Allegue e a alcaldesa do Concello de Mos, Nidia Arévalo, no acto para a firma do convenio que tivo lugar na avenida de Puxeiros.
Deste xeito, o goberno galego cofinanciará mediante a achega de 600.000 euros esta intervención que licitará o Concello de Mos co fin de poder tela rematada o próximo ano. Con esta actuación, o centro urbano de Mos quedará transformado nun espazo máis accesible, verde e adaptado ás necesidades dos cidadáns.
O proxecto abrangue a remodelación dun tramo de 170 metros da avenida de Puxeiros, outros 125 metros da avenida do Rebullón e a totalidade da superficie da rotonda dos Bois. Trátase así, dunha actuación integral que permitirá acadar unha vila máis amable e con maior accesibilidade, incrementando notablemente o espazo para uso peonil nesta contorna.
Ademais, o proxecto inclúe a dotación de máis zonas de estancia e esparexemento, espazos con xardíns, con novo mobiliario urbano e nova iluminación.
